السند والأمان للمرأة...قوة لا تُري ولكنها تصنع كل شئ
في عالم مليء بالتحديات، تحتاج المرأة إلى أكثر من مجرد صوتٍ مسموع… تحتاج إلى سند، إلى كتفٍ تتكئ عليه حين تميل الحياة، وإلى أمان يُشبه البيت الذي تعود إليه مهما ابتعدت.
كل امرأة فينا، سواء كانت أمًا، أختًا، زوجة، أو بنتًا، تخوض معركة ما… مع المجتمع، أو مع مسؤولياتها، أو حتى مع نفسها. وفي كل معركة، لا شيء يُكمل قوتها مثل كلمة "أنا جنبك" من شخص يؤمن بيها، ويدفعها لقدّام حتى وهي واقعة.
لكن السند مش بس راجل في حياتها… السند ممكن يكون صديقة بتفهم، أم بتطبطب، أو حتى مجتمع بيوفرلها فرصة حقيقية تثبت بيها نفسها من غير ما يخوّفها أو يقلل منها.
والأمان؟ الأمان مش في باب مقفول، ولا في بيت فخم. الأمان الحقيقي لما تحس إنها مش لوحدها، لما صوتها يتسمع، ودمعتها تتحترم، ونجاحها يتشجع.
عشان كده، محتاجين نخلق بيئة تكون فيها المرأة مش بس محمية… لكن مدفوعة إنها تحقق كل اللي بتحلم بيه من غير ما تحارب عشان بس "تتقبل".
ادعموا الستات في حياتكم… بالكلمة، بالفعل، بالاحترام، بالفرصة… وصدقوني، كل مرة تقف فيها امرأة على رجليها، بتسند بيها غيرها من غير ما تحس ...كونوا السند… وكونوا الأمان.
أمثلة واقعية للسند الحقيقي
أب يشجّع بنته على التعليم رغم ظروف المجتمع: لما أبو سارة قرر يكمّل تعليمها الجامعي رغم كلام الناس، ماكنش بس بيحقق حلمها… كان بيبني معاها ثقتها بنفسها للأبد.
زوج وقف جنب مراته وهي بتبدأ مشروع صغير: دعم بسيط من شريك حياتها خلاها تقف على رجلها وتكسب وتكون قدوة لغيرها.
صديقة شجعت صديقتها تروح جلسة علاج نفسي: كانت ممكن تنهار، لكن وجود صديقة واحدة فهمتها وقالتلها "مش عيب تطلبي مساعدة"، غيّر مجرى حياتها.
إزاي نكون السند الحقيقي؟
1. اسمعها بجد: اسمع كلامها من غير ما تقطعها أو تحكم، أوقات كتير هي محتاجة أذن، مش حل.
2. ادفعها لقدّام: شجّعها تجرب، تغلط، تتعلم، وتعيد المحاولة.
3. ما تستهترش بمشاعرها: الخوف، التعب، القلق… كل ده طبيعي. ما تسخرش منه، اتعامل معاه بإنسانية.
ليست هناك تعليقات:
إرسال تعليق